Dictionaries
Azərbaycan dilinin izahlı lüğəti
bozarmaq [bozarmax] feil
1. Boz rəng almaq, bozlaşmaq. □ Qadın qoca olduğuna və saçlarının tamamilə bozardığına baxmayaraq, çöhrəsində görünən təravət onun gənclikdə malik olduğu gözəlliyi andırırdı. (M.S.Ordubadi).
2. Solmaq, rəngi qaçmaq, rəngi getmək. □ Qızın rəngi gül kimi bozarmışdı. (M.Hüseyn).
3. Yetişməyə başlamaq, biçilmək (dərilmək) vaxtı çatmaq. □ Arpalar bozarmışdır. Qarpızlar yavaş-yavaş bozarır.
4. Çiskinləşmək, tutqunlaşmaq; soyuqlaşmağa başlamaq, duman və soyuq olmaq. □ Havalar bozarmışdır; Ağ saqqallı qış gəlir. (S.Rüstəm).
5. Yaxınlaşmaq, əlamətləri görünməyə başlamaq. □ Payız bozarır, dağüstü şəhərinin özündə və ətrafında meşələrdə ağaclar lütləşir. (S.Rəhimov).
6. Bişməyə, qovrulmağa başlamaq. □ Ət lap bozarıb, indicə xörək hazır olacaq.
7. Məcazi mənada: üzə qabarmaq; hörmətsizcəsinə, ədəbsizcəsinə, qabacasına cavab vermək, acıqlanmaq. □ Həsənov yenə bozarmaq istəyir, lakin cəsarət etməyib susur. (M.İbrahimov).
See also: