All dictionaries

kartoteka [k'artatek'a] isim yun. chartes – vərəq + theke – saxlanc

Müxtəlif informasiya və məlumatların yazıldığı kiçik vərəqlərin toplusu; belə vərəqləri saxlamaq üçün xüsusi yeşik. □ Elmi əsərlərin kartotekası.

kartric [k'artriç] isim ing. cartridge – patron

Çap qurğusunun içərisində toz və ya maye halında rəng maddələri olan hissəsi. □ Rəngli kartric.

karyera [k'aryera] isim fr. carriere < ital. carriera – qaçış, həyat yolu

Vəzifədə və ya müxtəlif fəaliyyət sahələrində irəliləmə, uğur qazanma. □ Karyera qurmaq.

kaskad [k'ask'at] isim fr. cascade – axın

1. Süni və ya təbii pilləli şəlalə. □ Kaskada baxmaq.

2. Operettada oxuya-oxuya sürətli rəqs etmə. □ Kaskad elementi.

3. Sirkdə (əsasən, komik səhnələrdə) akrobatın yerə yıxılmasının imitasiyası. □ Kaskad fəndi.

See also:

kaskadyor [k'ask'adyor] isim fr. cascadeur < casque – dəbilqə

1. Sirkdə kaskad əsasında qurulan nömrələrin ifaçısı. □ Kaskadyorların çıxışı.

2. Kino çəkilişi zamanı əsas aktyorun əvəzinə çətin, mürəkkəb və təhlükəli hərəkətləri icra edən idmançı dublyor. □ Filmin kaskadyoru.

kassasiya [k'asasiya] isim pol. kasacja < fr. cassation < lat. cassatio – ləğv, məhvetmə

1. Hüquq. Məhkəmədə tərəflərin xahişi, yaxud müstəntiqin tələbi ilə aşağı instansiyaların qərar və hökmlərinə yuxarı instansiyaların yenidən baxması. □ Kassasiya qaydası.

2. Hüquq. Yerli məhkəmə qərarının ləğv edilməsi ilə bağlı yuxarı məhkəmə instansiyasına yazılı müraciət. □ Kassasiya şikayəti.

kasta [k'asta] isim alm. kaste < port. casta – əcdad, nəsil

1. Şərqin bir sıra ölkələrində əsilli-nəcabətli, xüsusi hüquqlara malik müəyyən ictimai qrup. □ Kasta üzvü.

2. Məcazi mənada: öz maraqlarını başqalarından qoruyan qapalı ictimai qruplaşma. □ Kasta maraqları.

kataklizm [k'atak'lizm] isim fr. cataclysme < yun. kataklysmos – subasma, daşqın

Təbii fəlakət; təbiətdə və cəmiyyətdə böyük dağıntılar; uzunsürən dağıdıcı proseslərə təkan verən dalğavarı hadisələr. □ Siyasi kataklizm.

katapult [k'atapult] isim lat. catapulta < yun. katapeltes – atmaq, itələmək, tullamaq

1. Qədimdə qalaların mühasirəsi zamanı ox, daş və s. atmaq üçün işlədilən qurğu; mancanaq. □ Müasir katapult.

2. Gəminin göyərtəsindən təyyarələrin havaya qalxmasına kömək edən xüsusi mexanizm. □ Katapultlu gəmi.

3. Təhlükə zamanı təyyarəçinin kabinədən havaya avtomatik atılması üçün qurğu. □ Katapultu işə salmaq.

kazus [k'azus] isim lat. casus – tipik hadisə, situasiya

1. Dolaşığa salınmış qeyri-adi, gözlənilməz iş. □ Kazusla üzləşmək.

2. Hüquq. Cinayətin zahiri əlamətlərini özündə əks etdirsə də, hüquqi baxımdan məsuliyyət yaratmayan təsadüfi hərəkət.

3. Hüquq. Mürəkkəb, mübahisəli və ya dolaşıq hüquqi iş.

kempinq [kempink'] isim ing. camping – düşərgədə yerləşmək

1. Avtoturistlər üçün xüsusi yay düşərgəsi. □ Kempinq turistləri çadır və təkərli evlərlə təmin edir.

2. Əsasən, şəhərlərarası yol üstündə yerləşən, gecələmək üçün şəraiti olan yığcam, birmərtəbəli taxta və ya daş ev, kiçik hotel. □ Müasir kempinq.

keys [k'eys] isim ing. case – əl çamadanı, qutu, futlyar

1. Sənəd, kağız, qovluq və s. yığmaq üçün kiçik çamadan. □ Səfər keysi.

2. Müzakirələrin – diskussiya və debatın struktur elementi: spikerin çıxışında (nitqində) ilk dəfə səslənən dəlillərin, həmçinin onun mövqeyinə aid olan sübut və arqumentlərin məcmusu. □ Strateji cəhətdən aydın və dəqiq düşünülmüş keys böyük əhəmiyyət kəsb edir, çünki debatın gedişi çox vaxt onun üzərində qurulur.

kibernetika [kibernetik'a] isim ing. cybernetics < yun. kybernetike – idarəetmə sənəti

Maşın-mexanizm qurğularında, informatikada və cəmiyyətdə idarəetmə proseslərinin ümumi qanunauyğunluqlarına aid biliklər sistemi. □ "Kibernetika" anlayışını dövriyyəyə Amerika riyaziyyatçısı N.Viner gətirib.

kinologiya [kinalogiya] isim yun. kyon, kynos – it + ...logiya

İtlər, onların cinsləri və s. haqqında elm. □ Kinologiya itlərin anatomiya və fiziologiyasını, onların mənşə və təkamülünü, yetişdirilmə və seleksiyasını, yemlənməsini, saxlanmasını, əhliləşdirilməsini, onlardan ovda, qarovulda və s. xidmət növlərində istifadəsini öyrənir.

klaster [k'laster] isim ing. cluster – yığışma, toplaşma

1. Eynicinsli elementlərin vahid sistemdə birləşməsi. □ Atomların molekulda birləşməsini klaster adlandırmaq olar.

2. Anlayışların təsnifatını yaratmaq bacarığını inkişaf etdirən təlim üsulu; şaxələndirmə. □ Klaster şagirdləri mövzu ətrafında açıq və sərbəst düşünməyə sövq edir.