Azərbaycan şəxs adlarının izahlı lüğəti

MƏLAİKƏ

ərəb. malak sözündəndir (bax: ad – MƏLƏK), mələklərin cəmi anlamındadır. Klassik ədəbiyyatda da, danışıqda da gözəllik simvolu kimi işlənir.

Məlaikə qadın adı çox gözəl, gözəllər gözəli mənasını ifadə edir. Adın təhrif olunmuş forması Məleykə də sonradan müstəqil qadın adı kimi rəsmiləşmişdir. Bu gün ad məişətimizdə yalnız Məleykə şəklindədir.

MƏLEYKƏ

MƏLƏK

ərəb. malak sözündəndir. İslam dininə görə, Allahın göstəriş və əmrlərini yerinə yetirən, çox gözəl qadın surətində olub, qanadlı məxluqlardır.

Müqəddəs kitab “Qurani-Kərim”də mələklər incə və fəal bir varlıq kimi təqdim edilir. Burada mələklərin bəziləri insanların tutduğu əməlləri yazmaqla, bəziləri isə insanları qorumaqla, ona doğru yol göstərməklə, ilham vеrməklə və s. ilə məşğuldur. Adətən çox gözəl və ya məsum, xoşxasiyyət adam haqqında malak kimidir ifadəsi işlədilir. Türk antroponimik vahidlər sistemində mövcud Mələk qadın adı da eybi olmayan, hərtərəfli gözəl olan (qadın, qız) mənasını ifadə edir. Mələk həm də bir sıra mürəkkəb qadın adlarının tərkibində mövcuddur.

MƏLƏKBACI

ərəb. Malak adı və azərb. bacı sözünün birləşməsindən əmələ gəlmiş şəxs adıdır.

Mələkbacı (bax: ad – MƏLƏK; BACI) qadın adı mələk kimi xoşxasiyyət bacı, mələk kimi gözəl bacı mənalarını ifadə edir.

MƏLƏKBƏYİM

ərəb. Malak və azərb. mürəkkəb adların tərkibində işlənən Bayim adlarının birləşməsindən əmələ gəlmiş şəxs adıdır.

Mələkbəyim (bax: ad – MƏLƏK; BƏYİM) qadın adı mələk kimi gözəl qadın, qız mənasını ifadə edir.

MƏLƏKXANIM

ərəb. Malak və azərb. Xanım adlarının birləşməsindən əmələ gəlmiş şəxs adıdır.

Mələkxanım (bax: ad – MƏLƏK; XANIM) qadın adı Mələk xanım anlamını ifadə edir.

MƏLƏKMƏNZƏR

ərəb. Malak və Manzar adlarının birləşməsindən əmələ gəlmiş şəxs adıdır.

Mələkmənzər (bax: ad – MƏLƏK; MƏNZƏR) qadın adı xalq şeirində, folklorda gözəlin epitetlərindən biridir, mələk kimi həddən ziyadə gözəl mənasını ifadə edir.

MƏLƏKNAZ

ərəb. Malak adı və fars. naz sözünün birləşməsindən əmələ gəlmiş şəxs adıdır.

Mələknaz (bax: ad – MƏLƏK; NAZ) qadın adı mələk kimi nazlı gözəl mənasını ifadə edir.

MƏLƏKNİSƏ

ərəb. Malak və Nisa adlarının birləşməsindən əmələ gəlmiş şəxs adıdır.

Mələknisə (bax: ad – MƏLƏK; NİSƏ) qadın adı mələk kimi xoşxasiyyət gözəl qadınlar mənasını ifadə edir.

MƏLƏKNUR

ərəb. Malak adı və nur sözünün birləşməsindən əmələ gəlmiş şəxs adıdır.

Mələknur (bax: ad – MƏLƏK; NUR) qadın adı mələk kimi gözəlliyi ilə nur saçan (qadın, qız) mənasını ifadə edir.

MƏLƏKSİMA

ərəb. Malak və Sima adlarının birləşməsindən əmələ gəlmiş şəxs adıdır.

Mələksima (bax: ad – MƏLƏK; SİMA) qadın adı mələk kimi bacı, mələk kimi gözəl camallı, gözəl çöhrəli (qadın, qız) mənalarını ifadə edir.

MƏLƏKZƏR

ərəb. Malak və fars. zar sözünün birləşməsindən əmələ gəlmiş şəxs adıdır.

Mələkzər (bax: ad – MƏLƏK; ZƏR) qadın adı mələk kimi gözəlliyi ilə göz qamaşdıran (qadın, qız) mənasındadır.

MƏLHƏM

ərəb. malham (əslində marham) sözündəndir. Məlhəm qadın adı ağrıya dərman, çarə, əlac mənalarını ifadə edir.

MƏLİHA

ərəb. maliha sözündəndir. Məliha qadın adı məlahətli, lətafətli, şirin, xoşagəlimli (qadın, qız) anlamlarını ifadə edir.

Adın təhrif olunmuş forması Məlihə də sonradan müstəqil qadın adı kimi rəsmiləşmişdir. Türk xalqlarının, demək olar ki, hamısında Məliha adına (Meliha, Melihə kimi də) rast gəlinir.

MƏLİHƏ