Azərbaycan dilinin izahlı lüğəti

ağcadaban [ağcadaban] isim

Teatrşünaslıq. Qədimdə Azərbaycan milli meydan tamaşalarında məsxərə çıxaran, istedadlı, komik səriştəli, məzəli ifadə vasitələrindən bəhrələnən peşəkar oyunçu.

ağcaqanad [ağcaqanat] isim

Bəzi növləri qızdırma (malyariya) xəstəliyi törədən milçəyəoxşar sancan cücü; ditdili, hünü, mığmığa. □ Ağcaqanad dərmanı.

bağırsaq [bağırsax] isim

1. Anatomiya. Həzm prosesində mühüm rol oynayan bədən üzvü, selikli, elastik borular şəklində olur. □ Bağırsaqların bir neçə növü var.
2. İçərisindən su axıtmaq üçün rezin və ya brezent boru; şlanq.

bağırsaqboşluqlular [bağırsaxboşduxlular] isim

Zoologiya. Mədəsi, yaxud mədə rolunu oynayan qarın boşluğu olan ibtidai heyvanlar. □ Müxtəlif meduzalar, poliplər və mərcanlar bağırsaqboşluqlular adlanır.

bağırsaqlıq [bağırsaxlıx] isim

1. Anatomiya. Qarnın bağırsaqlar yerləşən hissəsi.
2. Anatomiya. İnsanın və ya heyvanın bütün bağırsaqları.

bağırsaqsız [bağırsaxsız] sifət

Bağırsağı olmayan. □ Bağırsaqsız heyvanlar.

bağırtı [bağırtı] isim

Çığırtı, nərə; bağırma səsi, səs-küy, qışqırtı, fəryad. □ Ayının bağırtısı. Bağırtı salmaq. Bağırtı qoparmaq.

bağırtma

bağırtmaq [bağırtmax] feil

1. Çığırtmaq, qışqırtmaq; bağırmasına səbəb olmaq.
2. Ağlatmaq. □ Uşağı bağırtmaq.

bağıryaran [bağıryaran]

bağıstan [bağısdan] isim fars

Bağlıq, çoxlu bağ olan yer.

bağışlama

bağışlamaq [bağışdamax] feil

1. Bir şeyi qarşılıqsız, əvəzsiz olaraq başqasına vermək, hədiyyə etmək, peşkəş vermək. □ At bağışlamaq. Torpaq bağışlamaq. Özgə kisəsindən (cibindən) pul bağışlamazlar. (Atalar sözü).
2. Məcazi mənada: bəxş etmək, vermək. □ Elə bil, bağışladın mənə sevinc dolu bir aləmi. (R.Rza).
3. Alacağından könüllü olaraq vaz keçmək, əl çəkmək; özünə çatacaq şeyi daha istəməmək. □ Borclarını bağışlamaq.
4. Günahından, təqsirindən keçmək, əfv etmək. □ ..Mənim dediklərimdə səhv və yanlışlıqlar olsa, bağışlamanızı xahiş edirəm. (Mir Cəlal).
5. Əmr şəklində: bağışla, bağışlayın, bağışlayınız – söylənməmiş bir sözə, yaxud namünasib bir işə görə üzr istəmək və ya söylənmiş bir fikri düzəltmək üçün deyilir. □ Bağışlayın, mən bilmədim ki, bu söz sizin xatirinizə dəyəcək. Sizi narahat etdiyim üçün məni bağışlayın. Səni çox gözləməyə məcbur etdim, bağışla.
6. Əmr şəklində: bağışla, bağışlayın, bağışlayınız – bir söz və ya hərəkətlə razı olmamağı və ya ona qarşı etirazı ifadə etmək üçün qətiyyən, heç, yox mənasında işlənir. □ Bağışla, elə şey yoxdur! Bağışlayın, mən buna heç vaxt razı ola bilmərəm.

bağışlanılmaz [bağışdanılmaz] sifət

Bağışlanıla bilməyən, bağışlanmağa layiq olmayan, əfvedilməz. □ Bağışlanılmaz nöqsan. Bağışlanılmaz günah. Bağışlanılmaz qüsur.

bağışlanılmazlıq [bağışdanılmazdıx] isim

Bağışlanıla bilməmə, əfv edilməzlik.