Azərbaycan dilinin izahlı lüğəti

pişxidmətbaşı [pişxidmətbaşı] isim

Arxaizm. Padşahların, hökmdarların sarayında baş xidmətçi. □ Bu vaxt pişxidmətbaşı... şaha yaxınlaşdı. (P.Makulu).

pişik [pişix'] isim

Zoologiya. Pələng, şir və s.-nin də daxil olduğu fəsiləyə mənsub (vəhşi növləri də olan) məməli ev heyvanı. □ Pişik öz balasını istədiyindən yeyər. (Atalar sözü).

pişikbaz [pişix'baz] isim

Pişikləri çox sevən, çoxlu pişik saxlayan adam.

pişikotu [pişiyotu] isim

Botanika. Kökündən dərman hazırlanan ot bitkisi; valeryan. □ Pişikotu preparatları.

pişim-pişimlə [pişim-pişimnən] zərf

Mehribanlıqla, oxşaya-oxşaya, acıqlandırmadan, dilə tutaraq. □ Tutmağa çalışdım bunları dilə; Yola gəlmədilər pişim-pişimlə. (S.Rüstəm).

pişnamaz [pişnamaz] isim fars

İlahiyyat. Məsciddə namaz qılanların qabağında duraraq namaz mərasimini idarə edən ruhani. □ Bu vaxt pişnamaz gəlib zöhr – günorta, əsr namazını qılardı. (H.Sarabski).

piş-piş [piş-piş]

Pişiyi çağırmaq üçün çıxarılan səsi bildirən təqlidi söz. □ Nə qədər piş-piş elədim, pişik gəlmədi.

pişpişi [pişpişi] isim

1. Botanika. Tərkibində “C” vitamini olan, toxumlarının hər iki tərəfi seyrək tüklərlə örtülü birillik ot-bitki.

2. Uşaq dilində pişik.

pişraz [pişraz] sifət fars

Dialekt. Tezyetişən, tezdəyən. □ Pişraz üzüm. Pişraz tut.

pişrov [pişrov] sifət fars

Arxaizm. İrəlidə gedən, öndə olan, qabaqcıl.

piştaxta [piştaxda] isim fars

1. Mağazada, dükanda satıcı ilə alıcını bir-birindən ayıran, üstündə mal göstərilən və buraxılan, qabaq tərəfi bağlı uzun stol. □ İlyas piştaxtanın üstündən əyilib, divardakı paltarlara diqqətlə baxdı. (Mir Cəlal).

2. Bazarda, bufetdə və s.-də üstündə şey satmaq üçün xüsusi stol. □ Göyərtini piştaxtanın üzərinə düzmək.

pişto [pişdo]

piştov [pişdov] isim

Arxaizm. Tapança. □ Mən ömrümdə bir dəfə də pişto atmamışam. (M.Hüseyn).

pişvaz [pişvaz] isim fars

Gələn adamı qarşılama, qabağına çıxma. □ Hədiyyə də pişvaza gələnlər içərisində idi. (Mir Cəlal).

piti [piti] isim

Hər adam üçün ayrı-ayrı güvəclərdə bişirilən bozbaş. □ Piti bişirmək.