Azərbaycan dilinin dialektoloji lüğəti

gəkgir

Hamamlı

Tərs. □ O, gəkgir adamdı.

gəkgirrix'

Hamamlı

Tərslik. □ Gəkgirrix' eləmə ə:, yekə oğlansan.

gəlbəri

Ordubad

Xışda, kotanda və s. boyunduruqla qolu birləşdirən zəncir və ya kəndir. □ Kotan sürəndə gəlbərini qırıblar.

gəldi

Oğuz

Gəlir, mədaxil.

gəldigedər

Meğri, Ordubad

Şadara. □ Məx’dəbin gəldigedərin Mirzəgil aparıp torpağ ələsinnər (Meğri).

gələ

Oğuz

Daşdan tikilmiş qoyun tövləsi.

gələnbeççə

Naxçıvan

Gələn kimi. □ Qalxoz sədri gələnbeççə iclas başlandı.

gələnvarın

Cəbrayıl

Hanada işlənən ağac alət. □ Bı hananın gələnvarını yaxşı işdiyir.

gələşmağ

Dərbənd

Toydan əvvəl məsləhətləşmək, məsləhət üçün yığışmaq. □ İmnəti Əhədpatşaha gələşmağçin cama:tı çağırdılar; Gələşmağdan so:ra gəlin görmağa gitədilər bizdə, so:ra paltar gitədi, unnan so:ra toya hazırraşadılar.

gələz

Qax

gəlgəl¹

Əli Bayramlı, Göyçay, İsmayıllı, Kürdəmir, Şamaxı

1. Suqabı (Əli Bayramlı, Göyçay, Kürdəmir, Şamaxı). □ Gəlgəlnən bir suvi aşırdım (Kürdəmir).

2. Kiçik sərnic (İsmayıllı). □ Güllü gəlgəli ver, qoyunu sağım.

gəlgəl²

Hamamlı

Kiçik araba. □ Haravanın balacası gəlgəldi, böyüyü seldi; Gəlgəlnən ensiz yollarda yük aparrıx.

gəlgəl³

Tərtər

Boyunbağı. □ Gəlgəl qızıldan olur.

gəlgəl⁴

Lənkəran

Uşaq döşəyi.

gəlin

Qazax

Cəhrədə iy keçirilən yer.

gəlinalladan

Salyan

Mədəcik (heyvanlarda). □ Zərxanım, apar o gəlinalladanı təmiz yuğınan.

gəlinanası

Goranboy

Yabanı bitki adı. □ Gəlinanası gicitkən kimi olur, ancax dalamır.

gəlinbardağı

Bakı, Quba

Şərbət qabı. □ Gəlinbardağıynən qabağ tuyda şərbət paylayardılar (Quba).