Azərbaycan dilinin izahlı lüğəti

taxılqurudan [taxılqurudan] isim

1. Taxılı qurutmaq üçün maşın.
2. Sifət kimi: taxılı qurutmaq üçün maşın. □ Taxılqurudan maşın.

taxılma

taxılmaq [taxılmax] feil

“Taxmaq” feilinin məchul növü.

taxılsəpən [taxılsəpən] isim

1. Toxum səpmək üçün maşın.
2. Sifət kimi: toxum səpmək üçün maşın. □ Taxılsəpən maşın.

taxılsovuran [taxılso:uran] isim

1. Taxılın dənini samandan ayıran maşın.
2. Sifət kimi: taxılın dənini samandan ayıran maşın. □ Xırmanın bir tərəfində qoyulan taxılsovuran maşınların da gurultusu eşidilirdi. (Ə.Əbülhəsən).

taxıltəmizləyən [taxıltəmizdiyən] isim

1. Taxılın dənini zibildən, xırda daşlardan və s.-dən təmizləmək üçün maşın. □ Taxıltəmizləyəni işə salmaq. 
2. Sifət kimi: taxılın dənini zibildən, xırda daşlardan və s.-dən təmizləmək üçün maşın. □ Qoca taxıltəmizləyən maşına baxır..

taxikardiya [taxik'ardiya] isim yunan

Tibb. Ürək yığılmalarının tezləşməsi, ürək döyüntüsü.

taxma

taxmaq [taxmax] feil

1. İki şeyin uclarını bir-birinə keçirmək, ilişdirmək, yaxud bir şeyi başqa bir şeyə keçirmək; sancmaq. □ Xub gözəldir, hamıya baxır; Ona baxana iynələr taxır. "Günəş" (Tapmaca).
2. Keçirmək. □ İşə xor baxma, boynuna torba taxar. (Atalar sözü).
3. Bir şeyi bir şeyin üstünə qoymaq, bənd etmək, ilişdirmək. □ Tahir sümük çərçivəli eynək taxmış ucaboy, buğdayısifət, qıvrımsaç alimi yaxşı xatırlayırdı. (M.Hüseyn).
4. Əyninə, əlinə keçirmək, geymək. □ Varı olan taxar, varı olmayan baxar. (Atalar sözü).

taxt [taxt] isim fars

1. Söykənəcəyi olmayan enli divan. □ Yaşıl taxt üstündə oturub pəri; Yaquta, mərcana bənzər ləbləri; Uzaqdan baxarsan, üzün gizlətməz; Əlini uzatsan, vurar neştəri. "Qızılgül" (Tapmaca).
2. Padşahların, hökmdarların rəsmi qəbul və təntənəli mərasimlər zamanı oturduqları zəngin bəzədilmiş kürsü. □ Bir taxtda iki padşah divan etməz. (Atalar sözü).

taxta [taxda] isim fars

1. Şalbandan mişarla kəsilmiş çox qalın olmayan yastı ağac parçası. □ Abdaldan paşa olmaz, taxtadan - maşa. (Atalar sözü).
2. Sifət kimi: taxtadan qayrılmış, taxtadan olan. □ Dəmir qapının da taxta qapıya işi düşər. (Atalar sözü).
3. Taxtadan qayrılmış qapı, pəncərə və s. tayı, layı. □ Xasay lampanı söndürdü, pəncərənin o biri taxtasını da atdı. (M.Hüseyn).
4. Hər hansı bir məqsəd üçün taxtadan hazırlanmış lövhəcik və s. □ Çertyoj taxtası. Şahmat taxtası. Yazı taxtası.
5. Parça (qumaş) zolağı. □ Göyərçin üstdən on iki taxta, ayağı yaşıl lentli tuman geymişdi. (S.Rəhimov).
6. Torpaq zolağı. □ Bu taxtada darı əkiləcək.

taxtabənd [taxdabənt] isim fars

Hər hansı məqsəd üçün taxtadan düzəldilmiş qurğu, yaxud taxtadan döşəmə vurulmuş yer. □ Tut ağacının altında taxtabənddə oturmaq.

taxtabiti [taxdabiti] isim

Zoologiya. Qansorucu kiçik tüfeyli cücü. □ Taxtabiti dərmanı.

taxtaçəkən [taxdaçəkən]

taxtakəsən [taxdakəsən] isim

1. Şalbanlardan taxta kəsən maşın; taxtaçəkən. 
2. Sifət kimi: şalbanlardan taxta kəsən maşın; taxtaçəkən. □ ..taxtakəsən, dəmiryonan dəzgahların .. komandirlərini danışdırıb sevinir, qibtə edirdilər. (Mir Cəlal).