Все словари

rəhmsiz [rəhimsiz] sifət

1. Rəhm bilməyən; mərhəmətsiz, insafsız, amansız. □ Rəhmsiz adam. Rəhmsiz baxışlar.

2. Zərf kimi: rəhm bilməyən; mərhəmətsiz, insafsız, amansız. □ Nökər xətasız olmaz, ağa – rəhmsiz. (Atalar sözü).

rəhmsizlik [rəhimsizdix'] isim

Mərhəmətsizlik, amansızlıq, insafsızlıq. □ Rəhmsizlik etmək.

rəhn [rəhn] isim ərəb

1. Girov. □ Onun bütün əmlakı rus bankının rəhnindədir. (M.S.Ordubadi).

2. Məcazi mənada: əsas, şərt, mənbə. □ Təmizlik sağlamlığın rəhnidir. (Atalar sözü).

rəhnüma [rəhnüma] isim fars

1. Klassik ədəbiyyatda yolgöstərən, bələdçi mənalarında işlənmişdir. □ Ümmətin rəhnüması tərbiyədir; Millətin pişvası tərbiyədir. (M.Ə.Sabir).

2. Klassik ədəbiyyatda müşayiəti ilə mənasında işlənmişdir. □ ..dərhal ayağa qalxaraq alafa altına alınmış gəlini qız yengələrinin rəhnümasilə evdən çıxarardılar. (R.Əfəndiyev).

rəxnə [rəxnə] isim fars

1. Yıxıq, dağınıq yer, çökmüş yer.

2. Məcazi mənada: zərər, ziyan.

rəxnələnmə

rəxnələnmək [rəxnələmməx'] feil

Dağılmaq, sökülmək; kökündən sarsılmaq, ziyan çəkmək.

rəxt [rəxt] isim fars

1. Arxaizm. Minik atına lazım olan şeylər. □ .. Əmiraslan bəyin övladı genə dünən də Ağcabədi bazarında dədələri osmanlıda qəsb etdiyi gümüş rəxtlərdən satırdılar. (M.F.Axundzadə)

2. Arxaizm. Döşənəcək, yataq.

Ötkün sözüm, kəskin baxtım olaydı,

Ağ otağım, zərrin rəxtim olaydı. (Aşıq Ələsgər)

3. Arxaizm. Səfər ləvazimatı.

4. Arxaizm. Paltar.

Hǝm sǝdǝfǝm, hǝm inciyǝm, hǝşrü sirat əsinciyəm,

Bunca qumaşü rǝxt ilǝ mǝn bu dükanǝ sığmazam. (İ.Nəsimi)

rəxtxab [rəxtxab] isim fars

Yataq, yorğan-döşək. □ Güləndam rəxtxab götürüb getdi balaca otağa. (Ə.Haqverdiyev).

rəis [rəyis] isim ərəb

1. İdarə edən, rəhbərlik edən, başçılıq edən adam; başçı, müdir. □ Bir gəmini iki rəis batırar. (Atalar sözü).

2. Arxaizm. Bir heyət və ya məclisin başında duran şəxs; sədr. □ Vəkillər heyəti rəisi. Hökumət rəisi.

rəislik [rəyisdix'] isim

Rəis vəzifəsi; başçılıq, rəhbərlik.

rəiyyət [rəiyət] isim ərəb

1. Bir dövlətin tabeliyində olan(lar); təbəə. □ Atabəy Məhəmməd, Marağa və Təbrizi alandan sonra şəhərlərə qasidlər göndərib, rəiyyətlərinə böyük qələbənin xəbərini elan etdirdi. (M.S.Ordubadi).

2. Aşağı təbəqədən olan, yoxsul adam. □ Xan arıqlayanda rəiyyətin canı çıxar. (Atalar sözü).

rəiyyətpərəst [rəiyətpərəs]

rəiyyətpərvər [rəiyətpərvər] sifət ərəb/fars

Arxaizm. Öz rəiyyətini sevən, onun rifahına çalışan. □ Atabəylər rəiyyətpərvər deyildir. (M.S.Ordubadi).

rəqabət [rəqa:bət] isim ərəb

1. Hər hansı bir sahədə eyni məqsədi əldə etmək üçün ayrı-ayrı şəxslər arasında mübarizə, çəkişmə.

2. Əmtəə istehsalında əmtəəni daha mənfəətlə istehsal etmək və satmaq üçün xüsusi istehsalçılar arasında mübarizə, yarış; kapitalizm şəraitində – daha çox mənfəət götürmək üçün kapitalistlər arasında mübarizə. □ Böyük sərmayəyə malik olan əcnəbi şirkətləri ilə yerli neft sahibləri rəqabət edə bilməzlər. (M.S.Ordubadi).