Azərbaycan dilinin izahlı lüğəti

canbirlik [cambirrix'] isim

Çox yaxınlıq, səmimilik, mehribanlıq. □ İnsanlar arasında canbirlik, mehribanlıq nə qədər çox olarsa, ədavət bir o qədər az olar.

cancığaz [cancığaz]

cançəkişmə [cançəkişmə] isim

Can üstə olma, ölüm halında olma. □ M.Ə.Rəsulzadə cançəkişərkən üç dəfə Azərbaycan deyərək əbədiyyətə qovuşmuşdu.

cançəkişməsi [cançəkişməsi]

candankeçən [cannankeçən]

candərdi [candərdi] zərf

Könülsüz, istəmədən, məcburi. □ Bir işi candərdi etmək. Tənbəl məktəbli hər zaman dərslərini candərdi oxuyurdu.

canəfza [canəfza] sifət fars

Klassik ədəbiyyatda canlandıran, canlandırıcı, ruhlandırıcı mənalarında işlənmişdir. □ Müşkin saçından bulmuşam şol buyi-canəfzayi kim... (İ.Nəsimi).

canfəşan [canfəşan] sifət fars

Canını əsirgəməyən, canını fəda edən, canından keçən. □ Eşq yolunda kim ki, ol yarına canfəşan gedər; Əhli-yəqin bilir kim, ol cənnətə bigüman gedər. (İ.Nəsimi).

canfəşanlıq [canfəşannıx] isim

1. Həddindən artıq can yandırma, səy göstərmə, cəhd etmə. □ Yeni doğulmuş uşağa canfəşanlıqla qulluq edirdi.
2. Məcazi mənada: həddindən artıq və ya yersiz hörmət göstərmə, əldən-ayaqdan getmə. □ Tədbirdə iştirak edən tanınmışların nəzərini çəkmək üçün canfəşanlıq edirdi.

canfəza [canfəza] sifət fars

Arxaizm. Ürəkaçan, fərəhverən, könülaçan.

Apardı könlümü bir xoş, qəməryüz, canfəza dilbər,

Nə dilbər – dilbəri-şahid, nə şahid – şahidi-sərvər! (İ.Həsənoğlu)

cangüdazlıq [cangüdazdıx] isim

Klassik ədəbiyyatda canyandıranlıq, canıyananlıq; fədakarlıq mənalarında işlənmişdir. □ Şərm eylə bu eşqbazlıqdan; Bifaidə cangüdazlıqdan. (M.Füzuli).

cangüdən [cangüdən] isim

Kimisə qoruyan, onun şəxsi təhlükəsizliyinə cavabdeh olan şəxs; mühafizəçi. □ Ömər bəyi üç cangüdən qoruyurdu.

cangülüm [cangülüm] isim

Qızların dəstə ilə iki cərgədə üz-üzə durub oxuya-oxuya oynadıqları bir oyun adı. □ Qızlar cangülüm oynamaq üçün həyətdə toplaşdılar.

canhacan [canhacan] zərf

Ürəklə, məhəbbətlə, riqqətlə, nəvazişlə, oxşaya-oxşaya. □ Ana körpəsini canhacan bağrına basdı.

canhövlü [canhö:lü]