Ərəb və fars sözləri lüğəti

cəmadat isim ərəb

Cansız təbiət.

Kim ki, zövq əhli degil, anı hesab eylə həcər,

Ləhni-Davud eləməz növi-cəmadatə əsər. (S.Ə.Şirvani)

cərgə isim fars

1. Cəmiyyət, yığıncaq.

2. Sürü, naxır, ilxı.

3. Sıra, düzüm.

cürm¹ isim ərəb

1. Günah, təqsir, qəbahət.

Həqqi batil еyləmişlər, işlənir cürmi-kəbir,

Şеyxlər şəyyad, abidlər abusən qəmtərir. (M.P.Vaqif)

2. Sifət kimi: yazıq, fağır.

cürm² isim ərəb

Planet.

cəmil sifət ərəb

Qəşəng, göyçək, gözəl.

Çün ləbin cami-Cəm oldu nəfxeyi-ruhülqüdüs,

Ey cəmilim, ey cəmalim, bəhrü kanım, mərhəba! (İ.Nəsimi)

cüda sifət fars

Ayrı, ayrılmış, uzaq düşmüş.

Eyləməz xəlvətsərayi-sirri-vəhdət məhrəmi

Aşiqi məşuqdən, məşuqi aşiqdən cüda. (M.Füzuli)

cəmal isim ərəb

Gözəllik, göyçəklik, gözəl üz, qəşəng sifət.

Ay ilə gün sücud edər surətini göricəgiz,

Bu nə cəmalü hüsn olur, səlli-əla cəmalinə. (İ.Nəsimi)

cəmilə

cəngü cədəl isim fars/ərəb

Döyüş, vuruş.

Hər sədavü səs ki, dünyaya dоlub əksər əqəl,

Cümlə məkrü alü fənnü fitnədir, cəngü cədəl. (M.P.Vaqif)

cifə isim ərəb

1. Leş, qoxumuş cəmdək.

2. Məcazi mənada: sərvət, var-dövlət.

Cifеyi-dünyayədir hər еhtiyacü iştiyaq,

Munca kim, еtdim tamaşa, sözlərə asdım qulaq. (M.P.Vaqif)

cud isim ərəb

Comərdlik, əliaçıqlıq.

Qılmasın dünyadə ultanlar mənə təklifi-cud,

Bəs dürür başımda tövfiqi-qənaət əfsəri. (M.Füzuli)

cünun isim/sifət ərəb

Dəlilik, dəli olma; dəli, divanə.

Pənbeyi-daği-cünun içrə nihandır bədənim,

Diri olduqca libasım budur, ölsəm kəfənim. (M.Füzuli)

ca

cabi isim ərəb

Vəqf icarələrini və zəkatı yığan adam.

cabir isim ərəb

1. Cəbr edən, zor işlədən, zülmkar.

2. Sınıqçı.

cadupərəst sifət fars

Caduya inanan.