Dictionaries
All dictionaries
yapışmaq [yapışmax] feil
1. Toxunduğu şeyə ilişib ayrılmamaq, yaxud zorla qopacaq bir surətdə bitişmək; sıvaşmaq. □ Kitabın səhifələri bir-birinə yapışmışdır. Ayaqqabılarıma qəliz palçıq yapışıb. Quru palçıq divara yapışmaz. (Atalar sözü).
2. Bir-birinə təmas edəcək dərəcədə yaxın olmaq, tamamilə yanaşmaq; çatmaq. □ Usta Ağabalanın saqqalı gicgahlarına getdikcə ucları nazilib gözəl surətdə qulaqlarına yapışmışdır. (Y.V.Çəmənzəminli).
3. Bir-birindən qopmamaq, ayrılmamaq. □ Susuzluqdan dodaqları bir-birinə yapışmışdı.
4. Tutmaq, bərk-bərk tutmaq, qarmalamaq. □ Əlindən yapışmaq. Qolundan yapışmaq. Suda böğulan saman çöpündən yapışar. (Atalar sözü).
5. Tutub qaldırmaq; qaldırmaq (çəkmək, dartmaq) üçün əli ilə tutmaq. □ Di gəl, bu şələyə yapış, qoy dalıma. (Ə.Haqverdiyev).
6. Dişlərini keçirmək, dişləri ilə tutub buraxmamaq. □ İt baldırımdan yapışdı.
7. Məşğul olmaq, başlamaq, girişmək, şüru etmək. □ Bir sənətdən yapışmaq. Bir işdən yapışmaq.
8. Məcazi mənada: dəymək, toxunmaq. □ Çovutma bir güllə gözlənilmədən; Yapışır alnıma, yıxılıram mən. (S.Vurğun).
9. Məcazi mənada: yapışıb əl çəkməmək, bir an belə aralanmamaq; əl çəkməyərək danışmaq, müraciət etmək, təngə gətirmək. □ Adama yapışdımı, əl çəkən deyil.
10. Keçmək, sirayət etmək. □ Soyuğa öyrənmiş adama azar çətin yapışar.
11. Məcazi mənada: bənd olmaq, mane olmaq, ...qoymamaq. □ Acıq edib gedənə yapışma.
See also:
yapma [yapma] isim
1. İncəsənət. Plastik və s. materiallardan düzəldilən bəzək. □ Yapma işləri.
2. Sifət kimi: bu cür düzəldilən. □ Yapma bəzək. Yapma naxışlar.
3. Divara yapılan təzək. □ Bir tövlə qayıtdırsan əgər, bir də samanlıq; Mən də sağaram, həm peyinin yapma qayırram. (M.Möcüz).
4. Bax: yapmaq.
5. Sifət kimi: süni, saxta, yalançı, uydurma, qondarma, yalan. □ Yapma gözəllik. Yapma məhəbbət.
Azərbaycan dilinin izahlı lüğətiyapmaq [yapmax] feil
1. Bişmək üçün təndirin divarına yapışdırmaq. □ Çörək yapmaq. Axtaran tapar, yoğuran yapar. (Atalar sözü).
2. Ümumiyyətlə, yapışdırmaq. □ Neyləyirdim bəzəyi, ya düzəyi? Dama, divara yapardım təzəyi. (M.Ə.Sabir).
3. Arxaizm. Etmək. □ Nə yapırsan, ay biçarə; Nə ölkəyə səs salırsan. (Molla Cümə).
4. Arxaizm. Tikmək, qayırmaq, düzəltmək, qurmaq. □ ...Tazədən bir möhkəm barı yapdılar. (“Dərbəndnamə”).
Azərbaycan dilinin izahlı lüğəti