Azərbaycan dilinin izahlı lüğəti

refraktometr [refrak'tametr] isim latın

Elektrotexnika. Müxtəlif cisimlərdə işığın sınma göstəricilərini ölçmək üçün cihaz.

refrijerator [refrijerator] isim fransız

1. Soyuducu maşının, mayenin buxarlandığı və aşağı temperaturun əmələ gəldiyi hissəsi; buxarlandırıcı.

2. Sifət kimi: tez xarab olan məhsulları daşımaq üçün soyuducu maşınlarla təchiz olunmuş vaqon, gəmi, avtomobil və s. □ Refrijerator vaqonu (gəmisi).

regent [regent] isim latın

Politologiya. Padşah əvəzinə ali hakimiyyəti həyata keçirən, dövləti müvəqqəti idarə edən şəxs.

regentlik [regentdix'] isim

Politologiya. Padşahın xəstələnməsi, uzun müddət başqa yerdə olması, yaxud həddi-büluğa çatmaması və b. səbəblərə görə monarxiya ölkələrində dövləti bir və ya bir neçə şəxsin müvəqqəti idarə etməsi.

rejim [rejim] isim fransız

1. Dövlət quruluşu, idarə üsulu. □ Çar rejimi. Xalq demokratik rejimi.

2. Yaşamaq, işləmək, istirahət etmək, yemək-içmək, yatmaq və s.üçün dəqiq müəyyən olunmuş qayda, üsul; nizam. □ Gündəlik rejim. Düşərgənin rejimi. Yemək rejimi.

3. Bu və ya digər məqsədlə müəyyən edilmiş qaydalar, tədbirlər sistemi. □ Zavodda təhlükəsizlik rejimi.

4. Bir şeyin iş, fəaliyyət və s. şəraiti. □ Maşının iş rejimi. İstilik rejimi.

rejissor [rejisor] isim fransız/latın

İncəsənət. Teatr və ya kinematoqrafiya quruluşunun bədii rəhbəri; quruluşçu. □ Tamaşanın rejissoru. Rejissorun göstərişi.

rejissorluq [rejisorrux] isim

1. İncəsənət. Rejissorun işi, sənəti, vəzifəsi.

2. İncəsənət. Tamaşanın, filmin quruluşuna rəhbərlik; rejissura. □ ..Əsərin rejissorluğu Gülsabah xanıma tapşırılır. (C.Cabbarlı).

rejissura [rejisura] isim fransız

1. Rejissorun fəaliyyəti, işi.

2. Tamaşanın, filmin quruluşuna rəhbərlik.

3. Tamaşa, film quruluşunun rəhbərləri; rejissorlar. □ ..Azərbaycan teatrının professional rejissurası yox idi. (C.Cəfərov).

reklam [rek'lam] isim latın

1. Bir adama və ya bir şeyə şöhrət qazandırmaq, yaxud istehlakçı,müştəri, tamaşaçı cəlb etmək məqsədilə görülən tədbirlər. □ Böyük dükanların vitrinləri, divarlar, hasarlar afişa, elan və reklamlarla dolu idi. (S.Rəhman).

2. Məşhurlaşdırmaq, populyarlaşdırmaq məqsədilə bir adam və ya bir şey haqqında məlumat yayma.

3. Bir adam və ya şey haqqında məlumat verən, diqqəti cəlb edən elan, plakat.

reklamasiya [rek'lamasiya] isim latın

İqtisadiyyat. Malın keyfiyyəti aşağı olduğu üçün zərəri ödəməkhaqqında tələb, iddia. □ Parçanın pis rənginə görə reklamasiya.

reklamçı [rek'lamçı] isim

Reklam tərtib edən, reklam düzəldən; reklam tərtibçisi.

rekon [rek'on] isim latın

Genetik rekombinasiyanın elementar vahidi.

rekordçu [rek'ortçu] isim

1. Rekord əldə etmiş idmançı; rekordsmen.

2. Əmək fəaliyyətində ən yüksək nailiyyətlər əldə etmiş adam. □ Rekordçu neft ustası.

3. Rekordlara, rekordizmə çox uyan adam.

4. Hər hansı bir xeyirli keyfiyyətinə görə rekord göstəricilərə malik ev heyvanı. □ Rekordçu camış. Rekordçu inək.

rekordçuluq [rek'ortçulux]

rekordizm [rek'ordizm] isim ingilis

İdman. Qeyri-sağlam rəqabət nəticəsində rekord qazanmağa göstərilən ifrat səy, rekorda uyma; rekordçuluq.