Azərbaycan dilinin izahlı lüğəti

pəncəkeş [pəncəkeş] isim fars

Çörəyin üzərinə naxış salmaq üçün alət.

pəncələmə

pəncələmək [pəncələməx'] feil

Pəncəsi ilə qapıb götürmək. □ Plovu pəncələmək.

pəncələşmə

pəncələşmək [pəncələşməx'] feil

Çarpışmaq, vuruşmaq, mübarizə aparmaq. □ Ölümlə pəncələşmək. Gecə ilə gündüz pəncələşir. (M.S.Ordubadi).

pəncə-pəncə [pəncə-pəncə] sifət

Üzərində pəncə şəklində gülləri, naxışları olan. □ Pəncə-pəncə parça.

pəncərə [pəncərə] isim

1. İşıq və hava gəlmək üçün evin və s. divarında açılan deşik və həmin deşiyi qapayan şüşəli çərçivə. □ Pəncərəni açmaq. Pəncərəyə şüşə salmaq.

2. Mühazirələr, dərslər arasında boş qalan vaxt; fasilə. □ Pəncərədə bikar qalmaq.

pəncərəaltı [pəncərəaltı] isim

Pəncərənin alt tərəfinə vurulan taxta. □ Pəncərəaltını yonmaq.

pəncərəli [pəncərəli] sifət

1. Pəncərəsi olan. □ Bu, qaya içində salınmış,... kiçikcə pəncərəli, bir qapıcığazlı daxma idi. (Ə.Əbülhəsən).

2. Pəncərəsi olan; fasiləli. □ Pəncərəli dərs cədvəli.

pəncərəsiz [pəncərəsiz] sifət

Pəncərəsi olmayan. □ Uçuq-sökük daxmalar, pəncərəsiz, işıqsız komalar. (C.Cabbarlı).

pəncərəüstü [pəncərəüsdü] isim

Pəncərənin üst tərəfinə vurulan taxta və ya qoyulan iri daş. □ Pəncərəüstünü yonmaq.

pəncəüzgəclilər [pəncəüzgəçlilər] isim

Zoologiya. Üzgəcləri pəncə şəklində olan heyvanlar fəsiləsi.

pəncşənbə [pənçşəmbə] isim fars

Cümə axşamı. □ Molla Xəlil həftənin pəncşənbə və cümə günlərini məsciddə oxuyacağını bildirmişdi. (S.Hüseyn).

pənd [pənt] isim fars

Klassik ədəbiyyatda nəsihət mənasında işlənmişdir. □ Mürşidin pəndini eyicə saxla; Damardan, ilikdən, qandan içəri. (Ş.İ.Xətai).

pəpə [pəpə] isim

1. Çörək.

2. Qırıntı, ovuntu. □ Çörək pəpəsi.